Wi snackt platt

Dütmal snackt wi mit Helmut Hamke över dat Festival op Platt mit Timsen vun'e Band Santiano, Gerrit Hoss un Sandra Keck, dat dat an'n Sünndag, den 9. August 2026, namiddags vunaf Klock 3 in Elmshorn to beleven gifft. Un wi hebbt twee Winner-Geschichten vun uns Geschichtenwettstriet "Vertell doch mal" för Jo: de Geschicht "Hochtietsdag" vun Christine Buettner ut Wedel un de Geschicht "Shoppy" vun Marcus Buck ut den Landkreis Stood.

Dütmal sünd wi in't Museumsdörp Volksdörp to Besöök. Wi kiekt uns de Smeed, den Krämerladen un dat Spiekerhuus an, snackt mit Museumswart Egbert Läufer un den Vereensvörsitter Reimer Lindemann, laat uns vun Marlies Stiefs un Heike Götz wat över dat Spinnen vertellen, lehrt de Lüüd vun'n Volksdörper Plattkrink kennen - un bavento maakt ok noch de "Dörpkapell" vun't Museum Musik för uns.

Dütmal hebbt wi ganz wunnerbare plattdüütsche Geschichten vun Hamborger Schölerinnen un Schölers för Jo. “Jungs un Deerns leest Platt” - so heet de plattdüütsche Leeswettbewarv vun’e Hamborger Scholen. De eerstplatzeerten Winnerinnen un Winners hebbt Ji hier bi “Wi snackt Platt” al vör en poor Weken höört, man bi't Finale op de grote Bühn vun't Ohnsorg-Theater weern noch so vele anner junge Vörleestalenten mit dorbi!

Dütmal sünd wi bi den Bardörper Wevkrink to Besöök, wi stellt Jo dat ne'e Book "Digitalisierung und KI - Verständlich erklärt und op Platt" vör, dorto maakt wi ok noch en lütten Utfloog hen na de Noordsee un stellt Jo en lütte Kapell för Feriengäst in Cuxhaven-Duhnen vör - un Frank Jakobs vertellt uns mehr över de "Sömmerferien" in Oostfreesland - mit en Oogenplinkern, versteiht sik. ne’et Book vör, wo Begrepen ut de Computerwelt in eenfach Wöör verkloort warrt – op Platt versteiht sik.

(00:00:00) Intro
(00:45) Uns Noorden - Norma
(04:28) Dat Book "Digitalisierung und KI op Platt" - Reinhard Goltz
(08:26) Kortenspeel - Lars & Dixi
(10:26) De Bardörper Wevkrink
(14:38) Strand! Goot! - Wattenläufer
(18:07) De Kapell för Feriengäst in Cuxhaven-Duhnen
(22:06) Achter Dünen un Diek - Godewind
(25:21) Sömmerferien - "Oostfreesland in echt" mit Frank Jakobs
(27:24) Ganz genauso - Timsen

Düssen Dingsdag is dat vun'e Hamborger Quickborn-Vereenigen künnig maakt worrn: Rolf Zuckowski warrt för siene Verdeensten för de plattdüütsche Spraak mit den Quickborn-Pries 2026 ehrt. An'n 26. September is de Priesvergaav in Lichtwarksaal vun'e Carl-Toepfer-Stiften. Wi graleert Rolf Zuckowski to sienen Pries un wi snackt mit em över de plattdüütschen Leder, de he för de Finkwarder Speeldeel schreven hett, över sien Leevde to de plattdüütsche Spraak un över de plattdüütschen Projekten vun siene Stiften "Kinder brauchen Musik". För Rolf Zuckowski is kloor: Plattdüütsch deit Kinner goot - un he apelleert an'e Hamborger Schoolpolitik: "Wi bruukt mehr Lehrinnen un Lehrers, de Plattdüütsch snacken un lehren köönt!"

Dat is aver lang noch nich allens düsse Week bi "Wi snackt Platt", denn wi sünd ok noch bi de "Aquarienfreunde Stellingen" to Besöök - un dat geiht üm den Autor Johann Diedrich Bellmann: 20 Johr is dat nu her, dat de plattdüütsche Dichtersmann un Denker in't Öller vun 76 Johr storven is. Wi besinnt uns op em.